जळगाव : प्रतिनिधी
सुवर्ण व्यावसायिकाला देण्यासाठी कारागिराने दिलेले ९७ हजार ५०० रुपये किमतीचे सोन्याचे मणी घेऊन दुकानातील कर्मचारी परस्पर पसार झाला. हा प्रकार दि. १४ ऑगस्ट रोजी घडला. याप्रकरणी दि. २७ नोव्हेंबर रोजी शनिपेठ पोलिस ठाण्यात योगेश भगवान गोयल (३२) याच्याविरुद्ध गुन्हा दाखल करण्यात आला आहे.
मिळालेल्या माहितीनुसार, अंकुश पुंडलिक सोनवणे (३२, रा. श्रीकृष्णनगर, विठ्ठल पेठ) हे सोने घेऊन त्याचे दागिने तयार करण्याचे काम करतात. दि. १४ ऑगस्ट रोजी त्यांनी योगेश गोयल याच्याकडे ऑर्डरचे ९७ हजार ५०० रुपये किमतीचे १३ ग्रॅम वजनाचे ७८ सोन्याचे मणी दिले. ते सराफ बाजारातील सुवर्ण व्यावसायिकाकडे देण्याचे सांगितले. परंतु योगेश गोयल याने ऑर्डरची डिलिव्हरी न करता मणी घेऊन पसार झाला. याप्रकरणी अंकुश सोनवणे यांनी शनिपेठ पोलिस ठाण्यात फिर्याद दिली. त्यावरून योगेश गोयलविरुद्ध गुन्हा दाखल करण्यात आला आहे. या घटनेचा पुढील तपास सहायक फौजदार रघुनाथ पवार करीत आहेत.
