चोपडा : प्रतिनिधी
तालुक्यातील गौऱ्यापाडा येथील संजय नानसिंग पावरा (२३) याने चारित्र्याच्या संशयावरून संतापाच्या भरात स्वतःच्या दोन चिमुकल्यांना कुन्हाडीने वार करून ठार केले; सुदैवाने १९ वर्षीय पत्नी बचावली पण ती गंभीर जखमी झाली आहे. ही घटना मध्य प्रदेशात शनिवारी घडली.
मिळालेल्या माहितीनुसार, गौऱ्यापाडा येथे हे दाम्पत्य पाच वर्षांचा मुलगा डेव्हिड आणि तीन वर्षाची मुलगी डिंपल यांच्यासह राहत होते. आरोपीचे पत्नीसोबत १८ नोव्हेंबरला जोरदार भांडण झाले. त्यामुळे पत्नी मुलीसह मध्यप्रदेशच्या सीमेवरील तिच्या आत्याच्या गावी रांजणगाव येथे निघून गेली. संजयच्या आई-वडिलांनी तेथे जाऊन भांडण केले. त्यानंतर नातेवाईक तिला माहेरी देवली येथे घेऊन गेले. त्यानंतर पती मुलाला घेऊन देवलीत दाखल झाला. यावेळी पत्नीसोबत झालेल्या भांडणात त्याने कुऱ्हाडीचे वार करून दोन्ही मुलांना जागीच ठार केले. पत्नीच्या डोक्यावरही कुन्हाडीने पाच ते सहा वार केले.
लोकांनी आरोपीला पोलिसांच्या स्वाधीन केले. याप्रकरणी मध्य प्रदेशातील वरला पोलिस स्टेशनमध्ये गुन्हा दाखल करण्यात आला आहे. संजयला वरला पोलिसांनी ताब्यात घेतले आहे. गंभीर जखमी पत्नीला मेंदूपर्यंत मार लागला असल्याने तिच्यावर धुळे येथील शासकीय रुग्णालयामध्ये शस्त्रक्रिया करण्यात आली असून ती मृत्यूशी झुंज देत आहे.
