जळगाव : प्रतिनिधी
भरधाव वाहनाने धडक दिल्यामुळे विकास आत्माराम चौधरी (३४, रा. गारखेडा बु, ता. जामनेर) या पादचाऱ्याचा जागीच मृत्यू झाला. ही घटना रविवारी मध्यरात्री जळगाव ते छत्रपती संभाजीनगर महामार्गावर रेमंड चौकाच्या पुढे घडली.
मिळालेल्या माहितीनुसार, मूळचे जामनेर तालुक्यातील रहिवासी असलेले विकास चौधरी हे जळगावात एका हॉटेलमध्ये कामाला होते. रविवारी रात्री ते पायी जात असताना मागून येणाऱ्या अज्ञात वाहनाने त्यांना जोरदार धडक दिली. ही धडक इतकी भीषण होती की, त्यात त्यांचा जागीच मृत्यू झाला. धडक दिल्यानंतर चालक वाहन घेऊन पसार झाला. काही जणांनी पोलिसांना माहिती दिली. त्यावेळी मयताला शासकीय वैद्यकीय महाविद्यालय व रुग्णालयात नेले.
खिशात आढळलेल्या कागदपत्रांवरून जामनेर तालुक्यातील विकास चौधरी यांचा मृतदेह असल्याचे निष्पन्न झाले. मयताची आई व बहीण पुणे येथे राहतात. धडक देऊन पसार झालेल्या वाहन चालकाचा पोलिसांकडून तपास करण्यात येत आहे.
