जळगाव : प्रतिनिधी
रस्त्याने जात असताना धक्का लागल्याच्या कारणावरून सतीश भीमा गवळी (५५, रा. प्रजापतनगर) व त्यांचे भाऊ अशोक भीमा गवळी यांना पाच जणांनी लाकडी काठी व लोखंडी रॉडने मारहाण केली. ही घटना २ नोव्हेंबर रोजी बळीराम पेठेत घडली. याप्रकरणी शहर पोलिस ठाण्यात पाच जणांविरोधात गुन्हा दाखल करण्यात आला आहे.
मिळालेल्या माहितीनुसार, सतीश गवळी हे रस्त्याने जात असताना एकाला धक्का लागला. त्यावरून वाद झाला व पाच जणांनी दोघा भावांना लाकडी काठी आणि लोखंडी रॉडने मारहाण करून गंभीर दुखापत केली. दोघांना शासकीय वैद्यकीय महाविद्यालय व रुग्णालयात दाखल करण्यात आले. याप्रकरणी सतीश गवळी यांनी शहर पोलिस ठाण्यात फिर्याद दिली. त्यावरून मारहाण करणाऱ्यांविरुद्ध गुन्हा दाखल करण्यात आला आहे. पुढील तपास पोहेकॉ प्रकाश पाटील करीत आहेत.
