जळगाव : प्रतिनिधी
लक्ष्मीपूजनादरम्यान देव्हाऱ्यात पूजेसाठी ठेवलेले १५ तोळे सोन्याचे दागिने व चांदीच्या काही वस्तू घर उघडे असल्याची संधी साधत चोरट्याने चोरून नेल्या. अॅड. प्रताप भीमराव निकम (५९, रा. गजानन कॉलनी) यांच्या घरात शनिवारी (२ नोव्हेंबर) सकाळी आठ वाजता चोरीची ही घटना घडली. भर दिवसा घडलेल्या या चोरीच्या घटनेने निकम कुटुंबीयांसह परिसरातील नागरिक धास्तावले आहेत.
मिळालेल्या माहितीनुसार, गजानन कॉलनीमधील अॅड. प्रताप निकम यांनी लक्ष्मीपूजनानिमित्त सोने-चांदीचे दागिने देव्हाऱ्यासमोर पूजेसाठी ठेवले होते. पूजा झाल्यानंतर रात्रभर हे दागिने तेथेच होते. शनिवारी (२ नोव्हेंबर) सकाळी ८ वाजता अॅड. निकम हे घरासमोरील मंदिरात दर्शनासाठी गेले होते तर त्यांच्या पत्नी घरामध्ये कामात व्यस्त होत्या. त्यावेळी त्यांच्या घरात एक चोरटा शिरला व पूजेत ठेवलेले दागिने घेऊन तो पसार झाला.
