जळगाव : प्रतिनिधी
आई-वडील शेतात काम करीत असताना झाडाला बांधलेल्या झोक्यातून सुमिना आमाश्या पावरा (२ वर्षे, रा. देवगाव, ता. जळगाव) या दोन वर्षांच्या चिमुकलीला अज्ञाताने उचलून नेले. हा धक्कादायक प्रकार रविवारी (३ नोव्हेंबर) देवगाव शिवारातील शेतात घडला. याप्रकरणी तालुका पोलिस ठाण्यात अज्ञाताविरुद्ध गुन्हा दाखल करण्यात आला आहे.
मिळालेल्या माहितीनुसार, धुळे जिल्ह्यातील झेंडे अंजन (ता. शिरपूर) येथील दाम्पत्य जळगाव तालुक्यातील देवगाव येथील शिवारातील एका शेतात सालदार म्हणून कामाला आहे. रविवारी दुपारी या दाम्पत्याने शेतात एका झाडाला झोका बांधून त्यात दोन वर्षीय सुमिना या चिमुकलीला झोपविले होते. मुलीची आई शेतात काम करीत असताना व वडील मालकासोबत गेलेले असताना अज्ञात व्यक्तीने झोक्यातून चिमुकलीला काढून नेले. या मुलीची आई झोक्याजवळ आली त्यावेळी तिला चिमुकली झोक्यात दिसली नाही.
याप्रकरणी हिराबाई आमाश्या पावरा यांनी तालुका पोलिस ठाण्यात फिर्याद दिली. त्यावरून अज्ञात व्यक्तीविरुद्ध गुन्हा दाखल करण्यात आला आहे. पुढील तपास सपोनि अनंत अहिरे करीत आहेत.
