अमळनेर : प्रतिनिधी
तालुक्यातील सारबेटे येथे दुचाकी चालवताना कट मारल्याच्या वादातून एका कुटुंबातील पाच जणांना १५ लोकांनी बेदम मारहाण केल्याची घटना शनिवारी घडली.
मिळालेल्या माहितीनुसार, सारबेटे येथील नाजिमखान मेवाती यांनी दिलेल्या फिर्यादीनुसार, काही दिवसांपूर्वी सारबेटे येथील पेट्रोल पंपाजवळ फैजलखान शफीकखान याने गुलताजखा हनीफखा मेवाती यांना दुचाकीने कट मारल्याने त्यांच्यात वाद झाले होते. त्याचा राग मनात ठेवून शनिवारी सकाळी ८:३० वाजेच्या सुमारास सारबेटे बस स्थानकाजवळ गुलताजखा मेवाती हे उभे असताना ताहीर अब्दुल रेहमान खान याने त्यांना शिवीगाळ केली. त्यावेळी अन्य लोकांचा जमावही जमला. या इसमांनी लोखंडी पान्हे, टॉमी, रॉड आदी साहित्य आणून मारहाण सुरू केली. मेवाती यांच्या घरातील पाच जणांना बेदम मारहाण करण्यात आली. त्यावेळी गावातील लोकांनी एकत्र येत सर्वांची सोडवणूक केली. त्यांना धुळेमधील हिरे मेडिकल येथे उपचारासाठी दाखल करण्यात आले. उपचारादरम्यान नाजिमखान याने दिलेल्या जबाबानुसार अमळनेर पोलिसांत गुन्ह्याची नोंद करण्यात आली असून, तपास स.पो.उ.नि. रामकृष्ण कुमावत हे करीत आहेत.
