जळगाव : प्रतिनिधी
पती-पत्नीचे भांडण झाले. त्यातून पतीने मारहाण केल्याने पत्नी त्याच्याविरुध्द तक्रार द्यायला पोलीस ठाण्यात गेली तर इकडे पतीने गळफास घेऊन आत्महत्या केली. आत्महत्येपूर्वी तरुणाने सुसाईड नोट लिहून ती आसाम येथे राहत असलेल्या मित्राला पाठविली. ही घटना बुधवारी रात्री साडे दहा वाजता चौघुले प्लॉट परिसरात घडली. मिलिंद शशिकांत दलाल (वय ३८) असे मयताचे नाव आहे. याप्रकरणी शनी पोलीस ठाण्यात अकस्मात मृत्यूची नोंद करण्यात आली आहे.
पोलिसांनी दिलेल्या माहितीनुसार, मिलिंद दलाल हा टेन्ट हाऊसचा व्यवसाय करायचा. चौघुले प्लॉट भागात पत्नी, सहा वर्षाची मुलगी, तीन वर्षाचा मुलगा यांच्यासोबत वास्तव्याला होता. पती-पत्नीत सातत्याने भांडण होत होती. बुधवारी रात्रीही दोघांमध्ये भांडण झाले. त्यात मिलिंद याने पत्नीला मारहाण केली. यामुळे पत्नीने शनी पेठ पोलीस ठाण्यात धाव घेतली. इकडे मिलिंद याने मी आत्महत्या करीत असल्याची चार ओळीची सुसाईड नोट लिहून ती आसाम येथे असलेल्या मित्राला व्हाटसअॅपवर पाठविली थोड्या वेळाने पत्नी घरी गेली असता मिलिंद याने गळफास घेतल्याचे दिसून आले. दोन्ही मुलांच्या मदतीने त्याला उतवून शासकीय वैद्यकिय महाविद्यालय व रुग्णालयात हलविले असता डॉक्टरांनी मृत घोषीत केले.
