चोपडा : प्रतिनिधी
अडावद येथील भगवाननगरातील बापू हरी महाजन (३५) या तरुणाच्या खून प्रकरणात एका अल्पवयीनासह तरुणास ताब्यात घेण्यात आले आहे. तंबाखू मागितल्याच्या क्षुल्लक कारणावरून घडलेल्या या खून प्रकरणाने अडावद गाव हादरले आहे. राज सुरेश महाजन (१९, रा. अडावद, ता. चोपडा) असे अटक केलेल्या संशयिताचे नाव आहे, तर अल्पवयीनाची बालसुधारगृहात रवानगी करण्यात आली आहे.
सविस्तर वृत्त असे कि, लोखंडेनगरात राहणाऱ्या बापू महाजन याचा लाकडी दांड्याने तसेच दगडाने ठेचून खून झाल्याची घटना १ रोजी सकाळी भगवाननगरात उघडकीस आली होती. याप्रकरणी मृत तरुणाचे मामा शांताराम पुना महाजन यांनी दिलेल्या फिर्यादीवरून मंगळवारी रात्री अज्ञातांविरूध्द गुन्हा दाखल करण्यात आला होता. अडावद पोलिसांना सीसीटीव्ही फुटेजमध्ये संशय वाटला. त्याआधारे ११ तासात संशयितांना ताब्यात घेण्यात आले. अडावदचे सपोनि. प्रमोद वाघ, पोउनि. राजू थोरात, शरीफ तडवी, भरत नाईक, सतीश भोई, भूषण चव्हाण, किरण शिरसाठ, शेषराव तोरे, शुभम बाविस्कर, मुकेश तडवी, संजय धनगर, विनोद धनगर, चंद्रकांत कोळी आदींनी तपासात कामगिरी केली.
