जळगाव : प्रतिनिधी
कामावरुन घरी परतत असताना रस्ता ओलांडणाऱ्या सदू ओंकार चव्हाण (६५, मूळ रा. आंबेवडगाव, ता. पाचोरा, ह. मु, नेहरुनगर) या सुरक्षा रक्षकास भरधाव बसने धडक दिल्यामुळे ते जागीच ठार झाले. हा अपघात शनिवारी रात्री सुमारास शिरसोली रस्त्यावरील कृष्णा लॉन समोर झाला. पोलिसांनी बस व चालकाला ताब्यात घेतले आहे.
मिळालेल्या माहितीनुसार, पाचोरा तालुक्यातील आंबेवडगाव येथील सदू चव्हाण हे मेहरूण तलाव परिसरात एका अपार्टमेंटमध्ये सुरक्षा रक्षक म्हणून काम करीत होते. शनिवारी रात्री ते कामावरुन घरी जात असताना पाचोऱ्याकडे जाणाऱ्या बसने (एमएच २०, बीएल ११९७) त्यांना धडक दिली. यात सदू चव्हाण यांचा जागीच मृत्यू झाला. पोलिसांनी घटनास्थळाहून धडक देणारी बससह चालकाला ताब्यात घेतले. याप्रकरणी एमआयडीसी पोलिस ठाण्यात गुन्हा दाखल करण्याचे काम सुरु होते.
