मुंबई : वृत्तसंस्था
राज्यातील अनेक ठिकाणी अपघाताच्या घटना घडत असतांना नुकतेच पूर्व द्रुतगती महामार्गावरील विक्रोळी नजीक गोदरेज कंपनीच्या परिसरात आज रविवार दि १५ रोजी सकाळच्या वेळेत कारचा भीषण अपघात झाला. या अपघातामध्ये सहाजण गंभीर जखमी झाल्याची प्राथमिक माहिती समोर आली आहे. या सर्व जखमींना रुग्णालयात दाखल करण्यात आले आहे. अपघातग्रस्त इनोव्हा गाडी भरधाव वेगात असल्यामुळे हा अपघात झाला असावा, असा प्राथमिक अंदाज आहे.
प्रचंड वेगात असलेल्या या इनोव्हा गाडीच्या चालकाचे गाडीवरील नियंत्रण सुटले आणि कार काही अंतरापर्यंत फरफटत जाऊन सर्व्हिस रोडलगतच्या दुभाजकावर आदळली. ही गाडी दुभाजकाला धडकल्यानंतर तेथील स्ट्रीट लाईटचा खांबही खाली कोसळला. या अपघातानंतर जखमींना गाडीतून बाहेर काढून जवळच्या शासकीय रुग्णालायात उपचारासाठी दाखल करण्यात आले आहे. यापैकी सहा जणांची प्रकृती गंभीर असल्याचे समजते.
