भुसावळ : प्रतिनिधी
पोलिसांनी गुप्त माहितीवरून वरणगाव रस्त्यावरील एमआयडीसी परिसरातील संकुलाजवळ सापळा रचून एकाला गावठी पिस्तूल व काडतुसांसह ताब्यात घेतले. ही घटना शनिवारी सायंकाळी ६ वाजता घडली. पोलिस निरीक्षक राहुल वाघ यांना गुप्त माहिती मिळाली.
मिळालेल्या माहितीनुसार, रेकॉर्डवरील गुन्हेगार हरीश राहुल उजलेकर (रा. वरणगाव, ता. भुसावळ) हा एमआयडीसी परिसरातील सद्गुरू इंजिस्टिटजवळील बांधकाम चालू असलेल्या शॉपिंग कॉम्प्लेक्सजवळ येणार आहे. यारून पोलिस उपनिरीक्षक मंगेश जाधव, पोहेका. विजय नेरकर, नीलेश बाबूलाल चौधरी, पोहेकॉ. महेश चौधरी, राहुल वानखेडे, भूषण चौधरी, प्रशांत परदेशी, जावेद शहा यांनी सापळा रचून त्याची झडती घेतली असता १५ हजार रुपये किमतीचे पिस्तूल, दोन हजार रुपये किमतीची दोन जिवंत काडतुसे मिळून आले. याप्रकरणी बाजारपेठ पोलिसांत गुन्हा दाखल करण्यात आला आहे.
