मुंबई : वृत्तसंस्था
राज्यातील अनेक ठिकाणी धक्कादायक घटना उघडकीस येत असतांना नुकतेच पालघर तालुक्यातील दुर्गम भागातील बर्डे पाड्यालगतच्या नाल्यात आईसह दोन वर्षीय मुलीचा मृतदेह आढळून आल्याने परिसरात खळबळ उडाली आहे. डोंगरालगतच्या नाल्यात सोमवारी (दि.२) दुपारी साडेतीनच्या सुमारास दोन्ही मृतदेह हातपाय बांधून दगडाला बांधलेल्या अवस्थेत आढळून आले.
मिळालेल्या माहितीनुसार, मनोर पोलीस ठाण्याचे अंमलदार यांनी घटनास्थळी धाव घेत दोन्ही मृतदेहाचा पंचनामा केला. सुश्मिता प्रवीण डावरे (वय २८) असे या मृत महिलेचे नाव आहे. ओढ्यात हात बांधलेल्या आणि दगडाला बांधून ठेवलेल्या अवस्थेत दोन्ही मृतदेह आढळून आल्याने घातपात केल्याचा प्राथमिक संशय व्यक्त केला जात आहे. या मृत महिलेचा पती मच्छीमार बोटीवर काम करीत असल्याची माहिती समोर आली आहे.
