जळगाव : प्रतिनिधी
आकाशवाणी चौकात भरधाव वेगाने जाणाऱ्या ट्रकने दिलेल्या धडकेत दुचाकीस्वाराचा मृत्यू झाल्याची घटना गुरुवारी दुपारी १:३० वाजता घडली, या प्रकरणी जिल्हापेठ पोलिस ठाण्यात ट्रक चालकावर गुन्हा दाखल करण्यात आला आहे. शेख रऊफ शेख अब्दुल्ला (वय ६९, रा. अक्सानगर, जळगाव) असे मृत व्यक्तीचे नाव आहे.
सविस्तर वृत्त असे कि, शेख रऊफ हे जळगाव शहरात मक्तेदारीचा व्यवसाय करीत होते. दुपारी १:३० वाजण्याच्या सुमारास महाबळकडून ते जिल्हाधिकारी कार्यालयाकडे कामानिमित्त जात होते. आकाशवाणी चौकात मोठ्या प्रमाणात वाहतुकीची वर्दळ असल्याने, पुलावरून अजिंठा चौकाकडे जाणाऱ्या ट्रकसाठी महाबळकडून येणाऱ्या वाहनांना थांबविण्यात आले होते. पुन्हा ही वाहतूक सुरळीत केली जात असतानाच शेख रऊफ हे जिल्हाधिकारी कार्यालयाकडे निघायला लागत असतानाच, पुलाकडून आलेल्या ट्रक (आरजे ११ जीबी ७६४२) ने त्यांच्या दुचाकीला (एम.एच.१९, बीडी २७५२) धडक दिली. त्यांना जखमी अवस्थेत खासगी रुग्णालयात नंतर जीएमसीत उपचारांसाठी दाखल केले. मात्र, उपचारांदरम्यान त्यांचा मृत्यू झाला.
