जळगाव : प्रतिनिधी
धावत्या रेल्वेतून पडल्याने ईश्वर मोतीराम ठाकूर (वय ५८, रा. इंद्रप्रस्थनगर) या महापालिकेतील कर्मचाऱ्याचा दुर्देवी मृत्यू झाला. ही घटना शनिवारी दुपारच्या सुमारास भुसावळ रेल्वे स्थानकाजवळ घडली. याप्रकरणी पोलिसात अकस्मात मृत्यूची नोंद करण्यात आली आहे.
सविस्तर वृत्त असे कि, शहरातील इंद्रप्रस्थ नगरात ईश्वर मोतीराम ठाकूर हे वास्तव्यास असून ते महापालिकेतील मार्केट वसुली विभागात नोकरीस होते. शनिवारी दुपारच्या सुमारास ते रेल्वेने भुसावळकडे जात असतांना रेल्वे स्टेशनाजवळ धावत्या रेल्वेतून पडल्यामुळे ते गंभीर जखमी झाले. ही घटना रेल्वे पोलिसांच्या लक्षात आल्यानंतर त्यांनी तात्काळ त्यांना रुग्णालयात दाखल केले. याठिकाणी त्यांच्याजवळ असलेल्या कागदपत्रांवरुन त्यांनी ओळख पटवल्यानंतर त्यांच्या कुटुंबियांना घटनेची माहिती देण्यात आली. त्यांनी लागलीच भुसावळ येथे धाव घेत जखमी ईश्वर ठाकूर यांना खासगी रुग्णालयात दाखल केले. परंतु याठिकाणी वैद्यकीय अधिकाऱ्यांनी तपासणी करीत त्यांना मयत घोषीत केले. याप्रसंगी त्यांच्या कुटुंबियांनी मनहेलावणारा आक्रोश केला. त्यांच्या पश्चात पत्नी, दोन मुले, सून, नातवंडे असा परिवार आहे.
