जळगाव : प्रतिनिधी
मुलीच्या लग्न सोहळ्यादरम्यान तिच्या आईने दागिन्यांची ‘हॅण्ड बॅग’ एका कोपऱ्यात ठेवली आणि काही क्षणात चोरट्यांनी सोन्याच्या दागिन्यांसह मोबाइल, रोख रक्कम असलेली बॅग लांबविली. ही घटना रविवारी (१४ जुलै) सुरभी लॉन या लग्नाच्या हॉलमध्ये घडली. या प्रकरणी एमआयडीसी पोलिस ठाण्यात अज्ञात चोरट्यांविरुद्ध गुन्हा दाखल करण्यात आला आहे.
सविस्तर वृत्त असे कि, महिला महाविद्यालयात उपप्राचार्य असलेले सतीश गुलाबराव जाधव (५२, रा. कोल्हे नगर) यांची मुलगी अचला हिचा लग्नसोहळा रविवारी औद्योगिक वसाहत परिसरातील सुरभी लॉन येथे आयोजित करण्यात आला होता. या सोहळ्यादरम्यान नववधूच्या आईने त्यांचे चार लाख ४८ हजार रुपये किमतीचे सोन्याचे दागिने रोख दोन हजार रुपये, एक मोबाईल असा ऐवज एका हॅण्ड बॅगमध्ये ठेवला होता. चोरी प्रकरणी सतीश जाधव यांनी एमआयडीसी पोलिस ठाण्यात फिर्याद दिली. त्यावरून अज्ञात चोरट्याविरुद्ध बीएनएस कलम 303(२)नुसार गुन्हा दाखल करण्यात आला आहे. पुढील तपास पोउनि दीपक जगदाळे करीत आहेत.
