रावेर : प्रतिनिधी
घरभरणीचा कार्यक्रम आटोपून घरी परतणाऱ्या दाम्पत्याच्या दुचाकीला बसने धडक दिली. यात महिला चाकाखाली बसच्या आल्याने चिरडून ठार झाली. ही घटना सोमवारी सायंकाळी ५:३० वाजेच्या सुमारास घडली. मृत महिलचे नाव आरती संदीप पाटील (३२, रा. आमोदा, ता यावल) असे आहे. याप्रकरणी बसचालकावर रावेर पोलिसात गुन्हा दाखल करण्यात आला आहे.
सविस्तर वृत्त असे कि, मोरगाव खुर्द (ता. रावेर) येथील जितेंद्र जगन्नाथ पाटील यांच्या कन्येचा शाहपूर (मध्यप्रदेश) येथे रविवारी विवाह झाला. सोमवारी बंभाडा, जि. ब-हाणपूरला घरभरणीचा कार्यक्रम आटोपून संदीप सीताराम पाटील व आरती पाटील हे दाम्पत्य मोटारसायकलने (एम. एच. १४/ए क्यू ११९६) आमोदा येथे जात असताना रावेरनजीक बालाजी टोलनाक्यासमोर भरधाव अहिरवाडी – रावेर या बस ( एम.एच.१४ /बी. टी. ३९१६) वरील चालक शेख तौसीफ शेख रफीक यांचा ताबा सुटल्याने जबर धडक दिली. यात आरती पाटील खाली पडल्याने त्यांच्या अंगावरून बस गेली. तामसवाडीचे उपसरपंच साजन चौधरी व रुग्णवाहिका चालक वासुदेव महाजन यांच्यासह काही तरुणांनी गंभीर जखमी अवस्थेत त्यांना रुग्णालयात आणले. त्यावेळी डॉ योगेश पाटील यांनी मृत घोषित केले.
