जळगाव : प्रतिनिधी
उघड्या घरातून दोन लाख रुपये किमतीचे सोन्याचे दागिने लांबविणाऱ्या कृष्णा पांडुरंग सोनवणे (वय २८, रा. शिवाजीनगर हुडको) याला शहर पोलिसांनी रविवारी (दि. १४) मुद्देमालासह अटक केली आहे.
सविस्तर वृत्त असे कि, शिवाजीनगर हुडको भागातील आनंदपाल बाविस्कर हे ११ जुलै रोजी पहाटे फिरायला गेले होते. त्यावेळी त्यांचा पुतण्या घरात झोपलेला असल्यामुळे घराचा दरवाजा उघडाच होता. याचा फायदा घेत चोरट्याने दोन लाख रुपये किमतीचे सोन्याचे दागिने चोरून नेले होते. गुन्ह्याचा तपास सुरू असताना ही चोरी कृष्णा सोनवणे याने केली असल्याची माहिती शहर पोलिस ठाण्याचे कर्मचारी सुधीर साळवे यांना मिळाली. त्यानुसार पोलिस निरीक्षक अनिल भवारी, सहायक फौजदार सुनील पाटील, पोहेकों किशोर निंकुंभ, भास्कर ठाकरे, उमेश भांडारकर, सतीश पाटील, पोलिस नाईक योगेश पाटील, अमोल ठाकूर, रतनहरी गिते यांनी कृष्णा सोनवणे याला रविवारी ताब्यात घेतले. त्याची चौकशी केली असता त्याने चोरीची कबुली दिली. त्याच्याकडून चोरीचा मुद्देमाल हस्तगत करण्यात आला.
