धरणगाव : प्रतिनिधी
तालुक्यातील मुसळी फाट्याजवळ रविवारी मध्यरात्री दीड वाजेच्या सुमारास लोखंडी रॉडने जबर मारहाण करून दोघांना लुटल्याची घटना घडली.
सविस्तर वृत्त असे कि, जळगाव येथील सुरेंद्र यादव व लक्ष्मण शिंदे हे दोघे मध्यरात्री दीड वाजेच्या सुमारास पिंप्री येथील मित्राला सोडून जळगावला आपल्या कारने परत जात होते. यावेळी त्यांच्या कारचा अपघात झाला. गाडीतील सामान चोरीला जाऊ नये, म्हणून दोघांनी मुसळी फाट्याजवळ कारमध्येच झोपण्याचा निर्णय घेतला. मध्यरात्री दीड-दोन वाजेच्या सुमारास दोन अज्ञात चोरटे आले व त्यांनी लोखंडी रॉडने मारहाण केली. यादव यांच्या गळ्यातील तीस हजार रुपये किमतीची सोन्याची चेन, मोबाइल, लॅपटॉप आदी ऐवज जबरीने लुटून पळ काढला. याप्रकरणी धरणगाव पोलिसांत दोन अज्ञात चोरट्यांविरुद्ध गुन्हा दाखल करण्यात आला आहे.
