पारोळा : प्रतिनिधी
चार दिवसांपूर्वी जेलमधून सुटून आलेल्या एकावर बंदूक रोखत त्याच्याकडे ३० हजार रुपयांची मागणी करत मारहाण करणाऱ्या चार संशयितांना परिसरातील नागरिकांनी चोप दिला. यातील दोन जणांना अटक झाली असून इतर दोन पसार झाले. पारोळा येथे शनिवारी रात्री १०.३० वाजेच्या सुमारास ही घटना घडली.
मिळालेल्या माहितीनुसार, सुनील ऊर्फ सल्ल्या लक्ष्मण पाटील (३६), ज्ञानेश्वर ऊर्फ अमोल वसंत पाटील (४०) आणि किरण प्रकाश पाटील (३५, सर्व रा. पारोळा) अशी आरोपींची नावे आहेत. चौथ्याचे नाव समजू शकले नाही. यातील सुनील व किरण यांना चार दिवसांची कोठडी सुनावण्यात आली आहे. फिर्यादीवर बंदूक व काडतुसे बाळगल्याप्रकरणी गुन्हा दाखल आहे. तो चार दिवसांपूर्वीच जेलमधून बाहेर आला होता. शनिवारी रात्री त्याला सुरुवातीला राम मंदिर चौकात धमकावण्यात आले, आणि त्यानंतर हल्लेखोरांनी त्याच्या घरीसुद्धा जाऊन त्याला गळफास देण्याचा प्रयत्न केला. शिवाय त्याच्या कुटुंबियांनाही मारहाण केली.
परिसरातील नागरिकांना फिर्यादी घरी काही तरी गडबड असल्याची शंका आली. त्यांनी चारही संशयितांना बाहेर काढत बेदम मारहाण केली. यातून या चारही जणांनी पळ काढला. त्यातील दोघांना पकडण्यात यश आले. या प्रकरणी वरील चारही जणांविरुद्ध पारोळा पोलिसात विनयभंगासह अन्य गुन्हा दाखल करण्यात आला आहे.
