अमळनेर : प्रतिनिधी
भिंतीला पडलेल्या भगदाडचा फायदा घेत अज्ञात चोरट्याने शिरुड येथे एका महिलेच्या घरात शिरून सुमारे ९९ हजारांचा ऐवज लंपास केल्याची घटना २९ रोजी पहाटे उघडकीस आली.
मिळालेल्या माहितीनुसार, शकुंतला दुर्योधन पाटील ह्या सून व दोन नातवांसह शिरुड येथे राहतात त्यांच्या शेजारी राहणारे नरेंद्र राजाराम पाटील यांच्या घराचे बांधकाम सुरू असल्याने त्यांच्या जुन्या घराची भिंत पाडली आहे. परिणामी त्यांच्या घरालगतच्या शकुंतला पाटील यांच्या राहत्या घराच्या भिंतीला भगदाड पडले होते. त्या ठिकाणी त्यांनी तात्पुरता प्लास्टिकचा कागद लावून विटाही ठेवल्या होत्या. २९ रोजी पहाटे ४ वाजेच्या सुमारास झोपेतून उठल्यावर त्यांना घरातील लोखंडी पत्र्याची पेटी जागेवर दिसून आली नाही.
भगदाडच्या ठिकाणचा प्लास्टिकचा कागद व विटाही नव्हत्या. शिवाय घरातील साहित्यही अस्ताव्यस्त पडलेले दिसले. पेटीचा इतरत्र शोध घेतला असता मिळून आली नाही. पेटीमध्ये ९९ हजार किमतीचे दागिने होते. चोरट्याने ते लंपास केले. शिवाय गावातील नरेंद्र उत्तम माळी यांच्याही घरातून ५ हजार रुपये रोख व १ ग्रॅम दागिने चोरी झाल्याचे उघडकीस आले. शकुंतलाबाई पाटील यांनी दिलेल्या फिर्यादीवरून अज्ञात चोरट्याविरुद्ध गुन्हा दाखल झाला आहे. पोलिस उपनिरीक्षक अक्षदा इंगळे तपास करीत आहेत.
