जळगाव : प्रतिनिधी
अल्पवयीन मुलीची छेड काढल्याच्या कारणावरुन नशिराबाद येथे दोन गटात दगडफेक झाल्याची घटना रविवार दि. २ जून रोजी दुपारच्या सुमारास घडली. छेड काढणाऱ्यांना अटक व्हावी आणि त्यांच्यावर कठोरात कठोर शिक्षा व्हावी, यासाठी पोलीस ठाण्याबाहेर काही जण आक्रमक झाले होते. यावेळी दोन गटांमध्ये बाचाबाची झाल्याने तणावाचे वातावरण निर्माण झाले होते. याप्रकरणी नशिराबाद पोलीस ठाण्यात छेडखानी करणाऱ्या तीन जणांविरोधात गुन्हा दाखल करण्यात आला असून एकाला अटक करण्यात आली आहे.
मिळालेल्या माहितीनुसार, जळगाव तालुक्यातील नशिराबाद येथील एका भागात राहणाऱ्या अल्पवयीन मुलीची छेड काढत तिला मारहाण केल्याची घटना रविवारी २ जून रोजी सकाळी ११ वाजता घडली. या घटनेनंतर जमावाने पोलीस ठाण्यासमोर गोंधळ घातला होता. दोन गट समोरासमोर आल्याने काही काळ तणावाचे वातावरण निर्माण होवून दगडफेक देखील करण्यात आली. मात्र नशिराबाद पोलीस ठाण्यातील कर्मचाऱ्यांनी वेळीच त्याठिकाणी धाव घेत जमावावर नियंत्रण मिळवले. दरम्यान, पीडित अल्पवयीन तरुणीची छेड काढणाऱ्या आरोपींना अटक व्हावी आणि त्यांच्यावर कठोरात कठोर शिक्षा व्हावी, यासाठी पोलीस ठाण्याबाहेर काही जण आक्रमक झाले. अनुचित प्रकार टाळण्यासाठी पोलिसांचा मोठा बंदोबस्त परिसरात तैनात करण्यात आल्याने याठिकाणी सायंकाळी उशिरापर्यंत तणावाचे वातावरण निर्माण झाले होते.
