जळगाव : प्रतिनिधी
मित्राला घेवून पैसे घेण्यासाठी येत असलेल्या दुचाकीस्वारांना भरधाव वाहनाने जोरदार धडक दिली. या अपघातात पवन वैजनाथ मंगरुळे (वय २४, रा. वाकोद, ता. जामनेर) या तरुणाचा जागीच मृत्यू झाला. तर त्याच्यासोबत असलेला मित्र राहुल लक्ष्मण सोनवणे हा गंभीर जखमी झाला. ही घटना म्हसावद गावाजवळ शनिवारी दुपारी दीड वाजेच्या सुमारास घडली. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
सविस्तर वृत्त असे कि, मंगरुळे हा त्याचा मित्र राहुल सोनवणे याच्यासोबत पैसे घेण्यासाठी म्हसावद जाण्यासाठी (एमएच १९, डीएन ४०५७) क्रमांकाच्या दुचाकीने निघाले. दुपारी दीड वाजेच्या सुमारास ते म्हसावद गावाजवळ पोहचल्यानंतर त्यांना अज्ञात भरधाव वाहनाने जोरदार धडक दिली. वाहनाची धडक इतकी जोरदार होती की, या धडकेत दुचाकी चालविणारा पवन याचा जागीच मृत्यू झाला. तर त्याचा मित्र राहुल सोनवणे हा गंभीर जखमी झाला. या अपघातात दुचाकीचा पुढील भागाचा पुर्णपणे चुराडा झाला होता. अपघात झाल्याने ग्रामस्थांनी त्याठिकाणी धाव घेतली.
