रावेर : प्रतिनिधी
तालुक्यातील चिनावल येथे ट्रॅक्टरला रोटाव्हेटर जोडणीचे काम करीत असताना ट्रॅक्टर मागे आले. यात ट्रॅक्टरच्या चाकाखाली दबल्याने शेतकऱ्याचा मृत्यू झाला. ही घटना रविवारी सायंकाळी घडली. या घटनेने या कुटुंबीयांवर शोककळा पसरली आहे.
मिळालेल्या माहितीनुसार, मृत शेतकऱ्याचे नाव यशवंत हेमचंद्र धांडे (५७) असे आहे. चिनावल येथे कुटुंबासह राहत होते. उन्हाळ्यात रात्रीच्या वेळी नांगरणी, रोटा करण्याचे काम सुरू जाते. रात्री शेतात रोटा करण्यासाठी जायचे असल्याने रविवारी सायंकाळी ते खळ्यात ट्रॅक्टरला जोडणी करीत होते. दरम्यान, ट्रॅक्टर सुरू असल्याने ते मागे आले. ट्रॅक्टरच्या चाकाखाली आल्याने यशवंत धांडे गंभीर जखमी झाले. ही घटना कुटुंबीयांच्या लक्षात आल्यानंतर त्यांनी तातडीने त्यांना फैजपूर येथे खासगी रुग्णालयात नेत असताना वाटेतच त्यांचा मृत्यू झाला. नातेवाइकांनी एकच आक्रोशही केला. त्यांच्या पश्चात पत्नी, मुलगा, मुलगी असा परिवार आहे.
