जळगाव : प्रतिनिधी
गिरणा नदी पात्रातून अवैधरित्या वाळूचा उपसा करुन तिची चोरटी वाहतूक करण्याचा प्रकार सुरुच आहे. नांदगाव शिवारात शेत गट क्रमांक 33 येथील गिरणा काठाजवळ अवैधरित्या वाळू वाहतुकीचे ट्रॅक्टर तालुका पोलिसांनी कारवाईतून जप्त केले. वैजनाथ, टाकरखेडा शिवारात गिरणानदीपात्रातून चोरी चुपके वाळूची चोरटी वाहतूक होत असल्याची सतत ओरड होत असते. मात्र प्रशासनाकडून दखल घेतली जात नसल्याचा आरोप काही शेतकऱ्यांनी केला.
सविस्तर वृत्त असे कि, तालुक्यातील नांदगाव येथे गिरणा नदी पात्रातून अवैधरित्या वाळूची चोरटी वाहतूक होत असल्याची माहिती तालुका पोलिसांना मिळाली. पोलीस निरीक्षक महेश शर्मा यांनी पथक नेमून ते रवाना केले. शनिवार दि. २७ रोजी पहाटे तीन वाजता पोलिसांनी अवैधरित्या वाळूने भरलेल्या ट्रॅक्टरवर कारवाई केली. मात्र पोलिसांना पाहिल्यानंतर चालक वाहन सोडून पसार झाला. वाळू वाहतुकीचे ट्रॅक्टर पोलिसांनी जप्त केले. याप्रकरणी पोलीस हेड कॉन्सटेबल बापू पाटील यांच्या तक्रारीवरुन तालुका पोलीस ठाण्यात गुन्हा दाखल झाला. तपास पोलीस हेड कॉन्सटेबल किरण आगोणे करीत आहेत.
