जळगाव : प्रतिनिधी
जिल्हाधिकारी कार्यालयाशेजारील प्रशासकीय इमारतीच्या आवारातील कृषी कार्यालयाच्या परिसरात बुधवारी दुपारी १२ वाजेच्या सुमारास अनोळखी तरुणाचा संशयास्पदरीत्या जळीत अवस्थेतीत कुजलेला मृतदेह आढळून आल्याने खळबळ उडाली आहे. याप्रकरणी जिल्हापेठ पोलिस ठाण्यात अकस्मात मृत्यूची नोंद करण्यात आली आहे.
सविस्तर वृत्त असे कि, जिल्हाधिकारी कार्यालयाशेजारील प्रशासकीय इमारतीच्या आवारात असलेल्या रोहित्राजवळ दुपारी १२ वाजेच्या सुमारास एका अनोळखी तरुणाचा संशयास्पदरीत्या जळालेला आणि कुजलेल्या अवस्थेतील मृतदेह आढळून आला. या परिसरात दुर्गधी येत असल्याने हा प्रकार उघडकीला आला. दरम्यान, या घटनेची माहिती मिळाल्यानंतर जिल्हापेठ पोलिस ठाण्याचे पोलिस उपनिरीक्षक उल्हास चहाटे, पो.कॉ. महेंद्र पाटील यांनी घटनास्थळी धाव घेऊन मृतदेहाचा पंचनामा केला. रुग्णावाहिकेतून मृतदेह शासकीय वैद्यकीय महाविद्यालयात रवाना करण्यात आला. मयताची ओळख अद्यापपर्यंत पटलेली नाही. मयताची ओळख पटविण्यासाठी नातेवाइकांनी जिल्हापेठ पोलिस ठाण्याशी संपर्क साधावा, असे आवाहन पोलिसांनी केले आहे. याप्रकरणी जिल्हापेठ पोलिस ठाण्यात अकस्मात मृत्यूची नोंद करण्यात आली आहे.
