पाचोरा : प्रतिनिधी
तालुक्यातील भोकरी येथे सरपंचपदावर असताना तक्रारी केल्यानेच आपण अपात्र झाल्याचा गैरसमज करून घेत एकाने आपल्या मित्रांसह तरुणावर तलवार व चॉपरने हल्ला केला. याप्रकरणी चौघांविरुद्ध गुन्हा दाखल करण्यात आला आहे.
सविस्तर वृत्त असे कि, येथून जवळच असलेल्या वरखेडीजवळील भोकरी येथे रविवारी सायंकाळी रफिक शब्बीर काहकर हा नमाज पठण करून बाहेर आला असता अरमान अब्दुल्लाखा काहकर याने तलवारीने, अब्दुल मिठू काहकर याने लोखंडी टॉमी, इमरान शफिक काहकर याने चॉपर व इमरान अब्दुल काहकर याने लोखंडी रॉडने डोक्यात व छातीवर जोरदार मारहाण केली. यात रफिक हा गंभीर जखमी झाला.
यावेळी अरमान हा रफिक यास म्हणाला की, ‘मी सरपंचपदावर असताना तू मित्रांसह माझ्याविरुद्ध खोट्या तक्रारी केल्या. त्यामुळेच मी अपात्र ठरलो.. त्यामुळे तुला जिवे मारून टाकेल.’ याबाबतची फिर्याद पिंपळगाव हरे पोलिस स्टेशनला रफिक शब्बीर काहकर याने दिली. त्यानुसार ४ जणांविरुद्ध गुन्हा दाखल झाला असून पुढील तपास सहायक पोलिस निरीक्षक प्रकाश काळे यांच्या मार्गदर्शनाखाली पोउनि अमोल पवार, सपोउनि विजय माळी करीत आहेत.
