जळगाव : प्रतिनिधी
दागिने घडवण्यासाठी दिलेल्या सोन्याच्या लगडसह सोन्याची चेन असे एकूण १७ लाख रुपये किमतीचे २५६ ग्रॅम वजनाचे सोने घेऊन बंगाली कारागीर पसार झाला. ही घटना गुरुवारी, २८ मार्च रोजी उघडकीस आली. याप्रकरणी शनिपेठ पोलिस ठाण्यात कारागिराविरुद्ध गुन्हा दाखल करण्यात आला आहे.
मिळालेल्या माहितीनुसार, शहरातील सुवर्ण व्यावसायिक सोन्याचे तुकडे, लगड हे कारागिरांना देऊन त्यांच्याकडून दागिने बनवून घेतात. याच पद्धतीने सोन्याचे व्यापारी शुभम प्रदीप वर्मा (३०, रा. लक्ष्मीनगर) यांनी कारागीर शेख अमीरुल हुसेन (२८, रा. पश्चिम बंगाल, ह.मु, जोशी पेठ, जळगाव) याला १५ लाख रुपये किमतीची २२५ ग्रॅम वजनाची सोन्याची लगड दिली. या सोन्यासह खेतेंद्र ओमप्रकाश शर्मा (रा. जळगाव) यांची दोन लाख रुपये किमतीची ३१ ग्रॅम वजनाची चेन असे एकूण १७ लाख रुपये किमतीचे २५६ ग्रॅम वजनाचे सोने घेऊन कारागीर शेख अमीरुल हुसेन हा पसार झाला. याप्रकरणी शुभम वर्मा यांनी शनिपेठ पोलिस ठाण्यात फिर्याद दिली. त्यावरून शेख याच्याविरुद्ध गुन्हा दाखल करण्यात आला आहे. पुढील तपास पोउनि. चंद्रकांत धनके करीत आहेत.
