जळगाव : प्रतिनिधी
ममुराबाद गावाजवळ बुधवारी सायंकाळी सहा वाजता रस्त्यात कुत्रा आडवा आल्याने भरधाव एसटी बसने दुचाकीला जबर धडक दिली. त्यानंतर चालकाचे नियंत्रण सुटल्याने ती झाडावर आदळली. या अपघातात दुचाकीवरील दोघे तरुण गंभीर जखमी झाले आहेत. त्यांच्यावर शासकीय वैद्यकीय महाविद्यालय व रुग्णालयात उपचार सुरू आहेत.
मिळालेल्या माहितीनुसार, आलम शेख (वय २८) आणि सादिक जुम्मा पिंजारी (२०, दोघे रा.आझादनगर, पिंप्राळा, जळगाव) हे दोघे रोजा सोडण्यासाठी बुधवारी सायंकाळी ६ वाजेच्या सुमारास दुचाकीने (जीजे ०६ केई ०५४२) जळगावला जात होते. समोरून येत असलेल्या एसटी समोर (एमएच १४ बीटी २२१६) कुत्रा आडवा आल्याने चालकाचे नियंत्रण सुटले. त्याने पुढील दुचाकीला जबर धडक दिली व त्यानंतर झाडाला एसटी धडकली. या अपघातात दुचाकीवरील आलम शेख व सादिक पिंजारी हे जबर जखमी झाले. त्यांना शासकीय वैद्यकीय महाविद्यालय व रुग्णालय येथे उपचारासाठी दाखल केले आहे.
