चंद्रपूर : वृत्तसंस्था
राहुल गांधींची भारत जोडो यात्रा ज्या राज्यांमध्ये गेली तिथे काँग्रेस फुटली. नेत्यांनी काँग्रेसला सोडले, अशी टीका उपमुख्यमंत्री देवेंद्र फडणवीस यांनी मंगळवारी चंद्रपुरात केले. चंद्रपूर लोकसभा मतदारसंघाचे भाजप व महायुतीचे उमेदवार सुधीर मुनगंटीवार यांच्या समर्थनार्थ झालेल्या जाहीर सभेत ते बोलत होते. ते म्हणाले, यंदाची लोकसभा निवडणूक नरेंद्र मोदी विरुद्ध राहुल गांधी असा लढा आहे. त्यामुळे मुनगंटीवार यांना दिलेले प्रत्येक मत हे मोदींना दिलेल्या मतासारखे राहणार आहे.
माझ्यासाठी साऱ्या जाती समान आहेत. ही निवडणूक जनतेची आहे. माझी लढाई काँग्रेसच्या उमेदवाराविरुद्ध नाही तर विकासासाठी आहे. जात किंवा सहानुभूतीवर नाही तर विकासाच्या मुद्द्यावर मी निवडणूक लढतोय, असा टोला सुधीर मुनगंटीवार यांनी यावेळी लगावला. मुनगंटीवार यांनी मंगळवारी मिरवणुकीतून जोरदार शक्तिप्रदर्शन करत आपले नामनिर्देशन दाखल केले. त्यानंतर आयोजित जाहीर सभेत मुनगंटीवार बोलत होते.
