जळगाव : प्रतिनिधी
लोकसभा निवडणुकीच्या पार्श्वभूमीवर लावण्यात आलेल्या नाकाबंदीत विना पावती २० लाखांच्या दागिन्यांसह जळगावच्या सराफा व्यावसायिकाला ताब्यात घेण्यात आले आहे. मुक्ताईनगरातील प्रवर्तन चौकात शुक्रवारी ही कारवाई करण्यात आली. भवरलाल जेठमल जैन असे व्यावसायिकाचे नाव आहे. त्यांच्याकडे विना पावती/विना परवाना २७९ ग्रॅम वजनाचे सोन्याचे दागिने आढळून आले असल्याची माहिती पोलिस सुत्रांनी दिली.
मुक्ताईनगर शहरातील प्रवर्तन चौकात पोलिसांच्या पथकाला एक चारचाकी वाहन जाताना दिसले. या वाहनाबाबत संशय आल्याने पोलिसांनी हे वाहन अडवले.संबंधित सराफाची चौकशी केली असता त्यांच्याकडे दागिन्याच्या पावत्या आढळून आल्या नाहीत. त्यावरून फिरत्या नाकाबंदी पथकाचे प्रमुख अनिल नेरपगार यांना तत्काळ बोलवून कायदेशीर कारवाई करण्यात आली. पोलिस निरीक्षक नागेश मोहिते, सहायक पोलिस निरीक्षक संदीप दूनगहू, पोहेका छोटू वैद्य, अभिमान पाटील यांच्या पथकाने ही कारवाई केली.
