यावल : प्रतिनिधी
गोवंशाची वाहतूक करताना एक वाहन गोरक्षकांनी दहिगावजवळ पकडले. तालुक्यातील दहिगाव-कोरपावली रस्त्यावर शनिवारी रात्री हनीफ दगडू तडवी रा. महलखेडी हा (वाहन क्रमांक एम. एच.०४एच. एस .१९८७) अवैधरीत्या गोवंश वाहतूक करीत होता. हा प्रकार दहिगाव गावातील गोरक्षकांच्या निदर्शनास आला असता त्यांनी वाहन पकडले. यानंतर यावल पोलिसांना माहिती देण्यात आली.
मिळालेल्या माहितीनुसार, घटनास्थळी पोलिस निरीक्षक प्रदीप ठाकूर यांच्या मार्गदर्शनाखाली सहायक फौजदार विजय पाचपोळ, हवालदार राजेंद्र पवार हे पथकासह दाखल झाले. त्यांनी वाहन व वाहनचालकाला ताब्यात घेतले. रात्री उशिरा याप्रकरणी यावल पोलिस गुन्हा दाखल करण्यात आला आहे. तपास पोलिस निरीक्षक प्रदीप ठाकूर यांच्या मार्गदर्शनाखाली यावल पोलिस करीत आहे.
