जळगाव : प्रतिनिधी
चित्रपट पाहण्यासाठी गेलेल्या कुटुंबाची कार पार्किंगमध्ये उभी केलेली असताना तिच्यावर धारदार वस्तूने ओरखडल्याने कारचे नुकसान झाले आहे. यात कारवर धारदार वस्तूने अश्लील शब्दही लिहिले आहेत. हा प्रकार शुक्रवार, १५ मार्च रोजी रात्री घडला. याप्रकरणी शहर पोलिस ठाण्यात अज्ञाताविरुद्ध अदखलपात्र गुन्ह्याची नोंद करण्यात आली आहे.
मिळालेल्या माहितीनुसार, कोल्हेनगर परिसरातील निखिल दीपक अग्रवाल हे पत्नीसह शहरातील एका चित्रपट गृहामध्ये चित्रपट पाहण्यासाठी गेले होते. सायंकाळी ७:१५ वाजेच्या सुमारास त्यांनी त्यांची कार (एमएच १९, ईजी २३५५) पार्किंगमध्ये उभी केली होती. रात्री १०:१५ वाजता ते चित्रपट पाहून बाहेर आले असता, त्यांच्या चारचाकीच्या चहूबाजूने अज्ञात टवाळखोरांनी धारदार वस्तूने ओरखडे पाडले होते, तसेच अश्लील शब्दही लिहिलेले होते. याविषयी अग्रवाल यांनी सुरक्षारक्षकांना विचारले असता त्यांनी उडवाउडवीची उत्तरे दिली. कुणीही सहकार्य करत नसल्याने अग्रवाल यांनी शहर पोलिस ठाण्यात तक्रार दिली. त्यावरून अज्ञाताविरुद्ध अदखलपात्र गुन्ह्याची नोंद करण्यात आली आहे.
