नवी दिल्ली : वृत्तसंस्था
ऑस्ट्रेलियात हैदराबाद येथील एका 36 वर्षीय महिलेची हत्या झाल्याची घटना समोर आली आहे. या महिलेच्या पतीवर हत्या केल्याचा संशय व्यक्त केला जात आहे. मिळालेल्या माहितीनुसार, शनिवारी बकले येथे एका महिलेचा मृतदेह रस्त्याच्या कडेला चाकं असलेल्या कचऱ्याच्या डब्यात सापडला होता. त्यानंतर पोलिसांना ही महिला भारतीय असल्याची ओळख पटली.
चैथन्या मधगनी असं मृत महिलेचं नाव आहे. ही महिला पती आणि मुलासोबत ऑस्ट्रेलियात राहत होती. माहिती मिळताच पोलिसांनी घटनास्थळ गाठून मृतदेह ताब्यात घेतला. व्हिक्टोरिया पोलिसांनी याबाबत प्रसिद्ध केलेल्या निवेदनात म्हटलं आहे की, 9 मार्च रोजी दुपारी विन्चेल्सीजवळील बकले येथे एक महिला मृतावस्थेत आढळून आली आहे. या घटनेचा तपास होमिसाईड स्क्वॉडचे पथक करत आहे. या महिलेच्या पतीवर संशय व्यक्त केला जात आहे. निवासस्थानी महिलेची हत्या करून तिचा मृतदेह कचऱ्याच्या डब्यात टाकल्याचा अंदाज त्यांनी व्यक्त केला आहे.
व्हिक्टोरिया पोलिसांनी पुढे सांगितले की, तपास पथक महिलेचा मृत्यू संशयास्पद मानत आहे. या महिलेचा पती ऑस्ट्रेलिया सोडून पळून गेलेला आहे. तो अचानक हैद्राबादला रवाना झाला होता. त्यांच्या मुलाला त्याने पत्नीच्या आईवडिलांकडे सोपवले आहे. या घटनेत अद्याप कोणालाही अटक करण्यात आलेली नाही.
