पारोळा : प्रतिनिधी
भर वस्तीत असलेल्या किसान महाविद्यालयाजवळ सकाळी ११ वाजेच्या सुमारास कारमध्ये गॅस भरताना भीषण आग लागल्याने कार जळून खाक झाली. या घटनेत चालक भाजला आहे.
मिळालेल्या माहितीनुसार, बुधवारी सकाळी १०:३० ते ११ वाजेच्या सुमारास राष्ट्रीय महामार्गावर असलेल्या किसान कॉलेजसमोर साने गुरुजीनगर येथे रमेश भिवसन चौधरी (५५, पारोळा) हे घरगुती गॅस प्रवासी वाहतूक करणाऱ्या कारमध्ये भरत होते. त्यावेळी शॉर्टसर्किट झाल्याने त्याचे आगीत रूपांतर होऊन गाडीमध्ये असलेल्या गॅसने अचानक पेट घेतला. बघता बघता आगीने रुद्रावतार घेतला. आगीचे लोळ बाहेर पडू लागले. काही वेळातच कार जळून खाक झाली. अर्ध्या तासापर्यंत आगीचा थरार परिसरातील रहिवाशांनी अनुभवला. यात रमेश भिवसन चौधरी हे किरकोळ भाजल्याची माहिती मिळाली आहे. घटनास्थळावरून पोलिस व पुरवठा विभागाने रिकामे ११ सिलिंडर जप्त केले आहेत. याबाबत पोलिसांत गुन्हा दाखल करण्यात आला आहे.
