जळगाव : प्रतिनिधी
शहरातील मायक्कादेवी मंदिराजवळ गांजाची चोरटी विक्री करणाऱ्या विनोद भीमराव शिंदे (४९, रा. वहीं ता. चोपडा) याला शनिपेठ पोलिसांनी अटक केली. त्याच्याकडून ३ किलो १२१ ग्रॅम गांजा जप्त करण्यात आला आहे. ही कारवाई सोमवार, ४ मार्च रोजी सायंकाळी करण्यात आली. शिंदे याच्याविरुद्ध गुन्हा दाखल करण्यात आला.
मिळालेल्या माहितीनुसार, संशय येऊ नये म्हणून विक्री करणाऱ्याने हा गांजा ‘स्कूल बॅग’मध्ये आणला होता. पोलिस निरीक्षक रंगनाथ धारबळे यांच्या मार्गदर्शनात पोउनि योगेश ढिकले, पोकों राहुल पाटील, राहुल घेटे, शशिकांत पाटील यांनी विनोद शिंदे याला ताब्यात घेतले. त्याच्याकडून २४ हजार ९६८ रुपये किमतीचा तीन किलो १२१ ग्रॅम वजनाचा गांजा हस्तगत केला. पुढील तपास पोउनि. प्रिया दातीर करीत आहेत.
