जळगाव : प्रतिनिधी
घरफोडी आणि दुचाकी चोरीच्या गुन्ह्यांमध्ये सहा वर्षांपासून फरार असलेल्या सुरेश राजाराम बारेला (२५, रा. देवळी, जि. बडवानी, ह.मु. चोपडा) याला स्थानिक गुन्हे शाखेच्या पथकाने मंगळवार, २७ फेब्रुवारी रोजी मुद्देमालासह चोपडा येथून अटक केली आहे. त्याच्याकडून घरफोडीतील साहित्य, चोरीच्या तीन दुचाकी मिळून १ लाख ४८ हजार ३७० रुपयांचा मुद्देमाल हस्तगत करण्यात आला आहे.
मिळालेल्या माहितीनुसार, चोपडा शहर पोलिस ठाण्यात सन २०१७ मध्ये दाखल चोरीच्या गुन्ह्यात सुरेश बारेला हा सहा वर्षांपासून फरार होता. त्याची माहिती स्थानिक गुन्हे शाखेचे वरिष्ठ पोलिस निरीक्षक किसन नजन पाटील यांना मिळाली. त्यांनी कारवाईच्या सूचना दिल्या. त्यानुसार पोहेकों कमलाकर बागूल, संदीप पाटील, प्रवीण मांडोळे, गोरख बागूल, अनिल देशमुख, संदीप साळवे, पोलिस नाईक ईश्वर पाटील, महेश सोमवंशी, लोकेश माळी यांनी सुरेश बारेला याला अटक केली. पोलिस अधीक्षक डॉ. महेश्वर रेड्डी यांच्या मार्गदर्शनात कारवाई केली गेली.
