जळगाव : प्रतिनिधी
कामावरून घरी परतत असताना समोरून येणाऱ्या भरधाव कारने दुचाकीला धडक दिल्यामुळे पंकज राजेंद्र मराठे (३४, रा. कानळदा, ता. जळगाव) हा तरुण ठार झाला. या अपघातात गोपाल वसंत पाटील (२९, रा. कानळदा, ता. जळगाव) हा गंभीर जखमी झाला आहे. हा अपघात शनिवार, २४ फेब्रुवारी रोजी रात्री जळगाव ते कानळदा रस्त्यावरील वळणावर झाला. याप्रकरणी तालुका पोलिस ठाण्यात कार चालकाविरुद्ध गुन्हा दाखल करण्यात आला आहे.
मिळालेल्या माहितीनुसार, तालुक्यातील कानळदा येथील पंकज मराठे हा तरुण जळगावातील एका गादी कारखान्यात कामाला होता. शनिवारी रात्री तो व त्याचा मित्र गोपाल पाटील दुचाकीने जळगाव येथून कानळदा येथे घरी जात होते. आव्हाणे गावाच्या पुढे गेल्यानंतर एका वळणावर कानळदाकडून येणाऱ्या भरधाव कारने (क्र. एम.एच. १४, पी १५६०) जोरदार धडक दिली. अपघातानंतर दुचाकीवरील दोघांना शासकीय वैद्यकीय महाविद्यालय व रुग्णालयात दाखल केले असता पंकज मराठे याला डॉक्टरांनी मृत घोषित केले. गंभीर जखमी गोपाल पाटील याला खासगी रुग्णालयात दाखल करण्यात आले आहे. अपघातानंतर रविवार, २५ फेब्रुवारी रोजी सकाळी मृताचे नातेवाईक व मित्र मंडळींची शासकीय वैद्यकीय महाविद्यालय व रुग्णालयात गर्दी झाली होती. याप्रकरणी तालुका पोलिस ठाण्यात कारचालकाविरुद्ध गुन्हा दाखल करण्यात आला आहे. पुढील तपास धनराज पाटील करीत आहेत.
