पाचोरा : प्रतिनिधी
शहरातील हिवरा नदीपात्रात एका अनोळखी तरुणाचा कुजलेल्या अवस्थेत मृतदेह आढळल्याने खळबळ उडाली आहे. याप्रकरणी पाचोरा पोलिस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, शहरातील सारोळा रस्त्यावरील हिवरा नदी पात्रातून दुर्गंधी येत असल्याचे नदी पात्राशेजारील नागरिकांनी संशय व्यक्त केला होता. २१ फेब्रुवारी रोजी दुपारी ३ वाजेच्या सुमारास अंदाजे ३० ते ३५ वयातील तरुणाचा मृतदेह कुजलेल्या अवस्थेत आढळून आला. या घटनेची माहिती मिळताच पोलिस उपनिरीक्षक योगेश गणगे हे पथक व रुग्णवाहिका चालक किशोर लोहार यांच्यासह घटनास्थळी दाखल झाले. रुग्णवाहिका चालक किशोर लोहार यांच्या मदतीने मृतदेह पाण्यातून बाहेर काढला.
घटनास्थळी पंचनामा करुन मृतदेह ग्रामीण रुग्णालयात दाखल करण्यात आला आहे. या मयताच्या अंगात काळ्या रंगाची जीन्स पँट, फुल बाहीचा निळ्या रंगाचा शर्ट आढळला आहे. याप्रकरणी पाचोरा पोलिस ठाण्यात अकस्मात मृत्यूची नोंद करण्यात आली आहे. तपास पोलिस कॉन्स्टेबल विनोद पाटील करत आहेत. या तरुणाबाबत माहिती असल्यास नागरिकांनी पाचोर पोलिस ठाण्यात संपर्क साधावा, असे आवाहन पोलिसांतर्फे करण्यात आले आहे.
