पाचोरा : प्रतिनिधी
खडकदेवळा येथून पाचोऱ्याकडे येत असताना जारगावजवळ मागून येणाऱ्या मिनीट्रकने कट मारीत दुचाकीस जोरदार धडक दिल्याने स्वार जागीच ठार झाल्याची घटना १४ रोजी रात्री साडेआठच्या सुमारास घडली आहे.
मिळालेल्या माहितीनुसार, नितीन प्रकाश सूर्यवंशी पाटील (३२, खडकदेवळा बु,, ता. पाचोरा) हे दुचाकी (एमएच१९/सीए१९०४) ने पाचोऱ्याकडे येत असताना मागून येणाऱ्या मिनीट्रकने (एमएच१८/बीजी८५७८) कट मारून जोरदार धडक दिली. यात दुचाकीस्वार नितीन सूर्यवंशी पाटील हे पुढच्या चाकाखाली येत जागीच ठार झाले. यावेळी मिनीट्रक चालक हा फरार झाला. नितीन पाटील हे प्रकाश पाटील (खडकदेवळा) यांचे पुत्र असून सेवानिवृत्त सैनिक आहेत. ते पाचोरा येथे मुलांच्या शिक्षणासाठी राहत होते. घराकडे येत असताना हा अपघात झाला. पश्चात पत्नी, आई-वडील, दोन मूले व भाऊ असा परिवार आहे.
