परभणी : वृत्तसंस्था
जिल्ह्यातील जिंतूर तालुक्यातील बोरी येथील नववीत शिकणाऱ्या अल्पवयीन मुलीची तिच्याच पतीने धारदार शस्त्राने वार करीत हत्या केली. गुरुवारी सकाळी हा प्रकार घडला. घटनेनंतर जयश्री हिचा पती रोहित गायकवाड हा बोरी पोलिस ठाण्यात हजर झाला, वारंवार सांगूनही पत्नी जयश्री ही आपल्यासोबत राहायला तयार होत नसल्याने आपण रागाच्या भरात तिचा खून केल्याची कबुली त्याने पोलिसांना दिली.
मिळालेल्या माहितीनुसार, धाराशिव जिल्ह्यातील भूम येथील रोहित गायकवाड ( वय २२) याच्याशी दोन वर्षापूर्वी जयश्री वाव्हळ प्रेमविवाह केला होता. त्यानंतर ते दोघे छत्रपती संभाजीनगर येथे काही दिवस सोबत राहिले. जयश्री ही गुरुवारी सकाळी सात वाजेच्या सुमारास शाळेत जात असताना पती रोहित याने धारदार शस्त्राने जयश्री हिच्यावर वार केले. पोलिसांनी तिला तत्काळ ग्रामीण रुग्णालयात दाखल केले. तिथे डॉक्टरांनी तिला मयत घोषित केले.
