छत्रपती संभाजीनगर : वृत्तसंस्था
राज्यातील अनेक ठिकाणी भीषण अपघाताच्या घटना घडत असतांना नुकतेच छत्रपती संभाजीनगर जिल्ह्यातील बिडकीन येथे एका स्कूल बसने चार वर्षाच्या मुलाला चिरडल्याची धक्कादायक घटना बुधवारी घडली. या घटनेत चिमुकल्याचा जागीच मृत्यू झाला. यावेळी घटनास्थळी जमलेल्या जमावाने संतप्त हाेत स्कूल बस पेटवून दिली.
पाेलिसांकडून मिळालेल्या माहितीनूसार या घटनेनंतर स्कूल बस चालक हा पळून गेला. या घटनेत हमजा शाहरुख शेख या चिमुकल्याचा मृत्यू झाला. ताे त्याच्या आई समवेत किरणा दुकानात निघाला होता. या दरम्यान सुसाट वेगाने आलेल्या बसने त्याला चिरडले. हे दृष्य पाहून हमजा याची आई भावूक झाली. तिने हंबरडा फाेडला.
दरम्यान संतप्त जमावने या बसमधील 10 ते 12 विद्यार्थी यांना बसमधून बाहेर उतरवले. त्यानंतर बसला घेराव घालून बसची तोडफोड केली आणि बस पेटवून दिली. या घटनेची माहिती मिळताच बिडकीन पोलिसांनी घटनास्थळी धाव घेतली. फायर ब्रिगेड देखील घटनास्थऴी पाेहचले. पाेलिस घटनेचा अधिक तपास करीत आहेत.
