जळगाव : प्रतिनिधी
चालकाला पैसे खाली पडल्याचे सांगत त्याचे लक्ष विचलित करून कारमध्ये ठेवलेला लॅपटॉप लहान मुलाच्या मदतीने अज्ञात चोरट्यांनी चोरून नेला. ही घटना शुक्रवार, ५ जानेवारी रोजी रात्री दाणाबाजारातील एका सुका मेव्याच्या दुकानासमोर घडली. याप्रकरणी शनिवार, ६ जानेवारी रोजी शहर पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, मित्राने नवीन दुकान सुरू केले म्हणून दर्शन ईश्वर चोरडिया (२४, रा. नवीन बसस्थानक जवळ) हे तेथे भेटण्यासाठी आले होते. त्यावेळी त्यांनी त्यांच्या लॅपटॉपची बॅग चालकाच्या बाजूच्या सीटवर ठेवली व दुकानात गेले. कारजवळ तीनजण आले व बसस्थानक कोठे आहे, असे कारमध्ये बसलेल्या चालकाला विचारले. त्याने पत्ता सांगितला व त्याचवेळी तुमचे पैसे खाली पडले असे तिघांनी चालकाला सांगितले. त्यामुळे चालक खाली पैसे पहायला उतरला आणि दुसऱ्या बाजूने एका लहान मुलाने कारचा दरवाजा उघडून लॅपटॉपची बॅग लांबविली.
