अमळनेर : प्रतिनिधी
तालुक्यातील लोंढवे गावात एका हॉटेलमध्ये दि.६ रोजी सायंकाळी पाणी मागण्याच्या कारणावरून दोघांनी हॉटेल मालक, वेटरसह चार जणांवर चाकूहल्ला केल्याची धक्कादायक घटना घडली आहे. यात हॉटेल मालक मनोहर काशीनाथ पाटील, पवन संतोष धनगर, योगेश पाटील, काळू भिल अशी जखमींची नावे आहेत.चौघांना धुळे जिल्हा सरकारी रुग्णालयात दाखल करण्यात आले आहे. त्यात मनोहर पाटील याला पोटावर वार लागल्याने तो गंभीर जखमी झाला आहे.
मिळालेल्या माहितीनुसार, लोंढवे येथील सर्वज्ञ हॉटेलमध्ये जानवे येथील अजय मंगल पारधी व जगन्नाथ शामराव पारधी हे दोघे जेवायला गेले होते. पाणी मागण्यावरून त्यांचा वेटरशी वाद झाला आणि दोघांनी चाकूने वार सुरू केला. ही भानगड आवरायला आलेल्या मालकावर आणि इतर सहकाऱ्यांनादेखील चाकू मारला, त्यात एकाला पोटावर मारल्याने त्याचे आतडे बाहेर आले. एकाला कमरेजवळ पोटावर मारल्याने किडनीला जखम झाली. दोघांना पाठीवर लागले आहे. आरोपी तेथून पळून गेले. जमलेल्या लोकांनी १०८ने जखमींना धुळे येथे हलवले. घटनेचे वृत्त कळताच पोलिस निरीक्षक विजय शिंदे, किशोर पाटील, रवी पाटील, दीपक माळी, शरद पाटील, मधुकर पाटील ताबडतोब रवाना झाले आणि माहिती काढून दोघा आरोपींना अटक केली.
