पुणे : वृत्तसंस्था
राज्यातील अनेक मोठ्या शहरात गुन्हेगारी घटना सातत्याने घडत असतांना नुकतेच ३१ डिसेंबरच्या रात्री पुण्यातील टोळक्यांनी दोन जणांना मारहाण केल्याची घटना उघडकीस आली आहे. कर्वेनगर भागातील हिंगणे होम कॉलनीतील हा प्रकार आहे. रात्रीच्या सुमारास टोळक्यांनी दोघांना मारहाण केल्याने परिसरात एकच दहशत पसरली आहे.
मिळालेल्या माहितीनुसार, पुण्यातील कर्वेनगर भागातील हिंगणे होम कॉलनीत टोळक्यांनी दोन जणांना मारहाण केली. राहुल कावळे आणि निखिल पाबळे असे मारहाण झालेल्या व्यक्तींची नावे आहेत. ३१ डिसेंबरला भररस्त्यात मारहाण केल्याने परिसरात दहशत पसरली आहे. वारजे पोलीस स्टेशनच्या हद्दीत ही घटना घडली आहे.
३१ डिसेंबरच्या रात्री राहुल कावळे आणि निखिल पाबळे हे दोघे रस्त्यावरून जात होते. पुण्याच्या कर्वेनगर भागातील हिंगणे होम कॉलनीतून जाताना सात ते आठ जणांचे टोळके आले. टोळक्यातील सात ते आठ जणांनी या दोघांना मारहाण केली. निखिल पाबळे हा रस्त्यावरुन जात होता. त्यावेळी टोळक्यातील एकाने त्याला कानशिलात लगावली. मारहाणीचा जाब विचारल्याने टोळक्यातील सात ते आठ जणांनी या दोघांनाही बेदम मारहाण केली. या प्रकरणाचा वारजे पोलीस अधिक तपास करत आहेत .
