जळगाव : प्रतिनिधी
वापी-यावल बसला सुरत-नागपूर महामार्गावरील दहिवेलनजीकच्या बोडकीखडी गावाजवळ ब्रेक फेल झाल्याने बसचा भीषण अपघात झाला. या अपघातात २० प्रवासी जखमी झाले आहेत. जखमींवर साक्री ग्रामीण रुग्णालयात उपचार सुरु आहे. मंगळवारी सकाळी ११ वाजेच्या सुमारास हा अपघात घडला.
मिळालेल्या माहितीनुसार, मंगळवारी सकाळी ११ वाजेच्या सुमारास सुरत- नागपूर राष्ट्रीय महामार्गावरील दहिवेलनजीक असलेल्या बोडकीखडी गावाजवळ वापीहून यावल जाणारी एमएच २०. बीएल ३३७७ क्रमांकाच्या बसचे ब्रेक फेल झाल्याने चालकाचे वाहनावरील नियंत्रण सुटले. यामुळे बस ट्रकला धडकली.
अपघातानंतर ट्रक चालकाने घटनास्थळी न थांबता ट्रक पळवून नेला. दहिवेल औट पोस्टवरील पोलिस कर्मचारी राजू जाधव, सागर चौधरी, दिनेश मावची घटनास्थळी पोहोचले. त्यांनी बसमधील २० जखमी प्रवाशांना उपचारार्थ तात्काळ दहिवेल प्राथमिक आरोग्य केंद्रावर दाखल केले. दहिवेल प्राथमिक आरोग्य केंद्रात प्राथमिक उपचार केल्यानंतर प्रवाशांना अधिक उपचारासाठी साक्री ग्रामीण रुग्णालयात पाठविण्यात आले आहे.
अपघातात जखमी झालेल्या प्रवाशांमध्ये रलाबाई सूर्यभान माळी (३६, रा. वार कुंडाणे, ता.धुळे), सूर्यभान फकीरा माळी (५६, रा.वार कुंडाणे), कल्पना वेच्या वसावे (२६, नेर, ता. धुळे), राजश्री गोरख चौधरी (रा. बहादरपूर ता. पारोळा), गोरख पांडुरंग चौधरी (५३, बहादरपूर ता. पारोळा), रत्नाबाई वाघ (५८, रा. वार कुंडाणे, ता. धुळे), समाधान कैलास पाटील (३७, रा. मालेगाव), जमाल खाटीक (५३, रा. धुळे), शेख गुजर (७५, रा. साक्री), सेंदा बी (६५, रा. साक्री), सुभाष दिनकर चौधरी (रा. धुळे), कल्पना सुभाष चौधरी (रा. धुळे), निर्मला यशवंत लाड (रा. नामपूर), हेमलता प्रवीण सोनार (रा. धुळे), सुयश प्रीण सोनार (रा. धुळे), मिनाबाई रामचंद्र अहिरे (रा. बोरकुंड ता. धुळे), लताबाई काळू ठाकरे (रा. बोरकुंड ता. धुळे), मनोहर भरत ठाकरे (१५) (रा. बोरकुंड), पंकज गुलाब राठोड (रा. धुळे), प्रमिला अनिल पाडवी (रा. साक्री) यांचा समावेश आहे.
