जळगाव : प्रतिनिधी
धावत्या रेल्वेच्या धडकेत तापी पाटबंधारे विभागातील लिपिक बळीराम माधव मराठे (५६, रा. सहयोग कॉलनी, पिंप्राळा) हे ठार झाले. ही घटना शनिवारी सायंकाळच्या सुमारास आशाबाबानगरजवळील रेल्वेरुळावर घडली. याप्रकरणी रामानंद नगर पोलिस ठाण्यात अकस्मात मृत्यूची नोंद करण्यात आली आहे. याठिकाणी मयताच्या मुलीने वडिलांना बघण्यासाठी आग्रह केला. पोलिसांनी तिला रोखल्यामुळे मुलीने आक्रोश केला होता.
मिळालेल्या माहितीनुसार, पिंप्राळा परिसरातील सहयोग कॉलनीत रहिवासी बळीराम मराठे हे तापी पाटबंधारे विभागात लिपिक म्हणून नोकरी करीत होते. शनिवारी सायंकाळच्या सुमारास आशाबाबा नगरजवळील अपलाइनवरील खांब क्रमांक ४१७ जवळील ८ ते १० च्या दरम्यान, रेल्वेची धडक लागल्याने मराठे यांचा जागीच मृत्यू झाला.
या घटनेची माहिती लोको पायलटने रेल्वे पोलिसांना दिली. त्यानुसार आरपीएफ विनोद साळवे यांच्यासह रामानंदनगर पोलिस ठाण्यातील पोहेकों राजेश चव्हाण, पोलिस नाईक कालसिंग बारेला, नितेश बच्छाव, अजीज शहा यांनी घटनास्थळी जाऊन पंचनामा केला. मृतदेह शासकीय वैद्यकीय महाविद्यालय व रुग्णालयात नेला. याप्रकरणी रामानंदनगर पोलिस ठाण्यात अकस्मात मृत्यूची नोंद करण्यात आली आहे. जावयाने ओळख पटवली घटनेची माहिती मिळताच बळीराम मराठे यांच्या मुलीने घटनास्थळी धाव घेतली. यावेळी मुलीने वडिलांना मृतदेह बघण्यासाठी आग्रह केला. मात्र, पोलिसांनी तिला रोखल्यामुळे मुलीने एकच आक्रोश केला होता. थोड्या वेळानंतर बळीराम मराठे यांच्या जावयाने त्यांची ओळख पटवली.
