मुक्ताईनगर : वृत्तसंस्था
मध्य प्रदेशातून इच्छापूर हद्दीमधून मुक्ताईनगरकडे येणाऱ्या एका चारचाकी गाडीतून सुमारे साडेआठ लाखांचा गुटखा मुक्ताईनगर पोलिसांनी जप्त केला. ही कारवाई गुरुवारी सायंकाळी शहरातील प्रवर्तन चौकाजवळ करण्यात आली. या प्रकरणी चालकाला अटक करण्यात आली आहे.
मिळालेल्या माहितीनुसार, अवैधरीत्या गुटखा वाहतूक केली जात असल्याची गुप्त माहिती पोलिस हेडकॉन्स्टेबल विनोद सोनवणे यांना मिळाली. त्यानुसार पोलिस उपनिरीक्षक राहुल बोरकर, संदीप वानखेडे, दीपक ठाकरे, राहुल बेहेनवाल यांच्या पथकाने मुक्ताईनगर प्रवर्तन चौकाजळ संशयित चारचाकी गाडी क्रमांक (एमपी ६८, झेडए ९८६२) ताब्यात घेतली. या कारची तपासणी केली असता, सुगंधी तंबाखू व गुटखा सापडला, पोलिसांनी या वाहनाचा पाठलाग केला होता. वाहन थांबविण्याचा इशारा केला असता, चालकाने वाहन जोरात पळवून नेण्याचा प्रयत्न केला. दरम्यान, शहरात प्रवर्तन चौकात नाकाबंदी लावून वाहनधारकाला पोलिसांनी ताब्यात घेतले. या चारचाकी गाडीतून पान मसाला, गुटखा, तंबाखू असा सुमारे ८ लाख २९ हजार २२० रुपयांचा मुद्देमाल जप्त केला आहे. या प्रकरणी शेख अबिद शेख जहीर (३०, रा. राजघाट काली मशीदजवळ, बन्हाणपूर) याला अटक केली आहे. अधिक तपास पोलिस उपनिरीक्षक राहूल बोरकर करत आहेत.
