चाळीसगाव : प्रतिनिधी
लग्न समारंभात महिलेच्या पर्समध्ये ठेवलेले सोन्याचे दागिने, रोकड आणि मोबाईल लंपास करणाऱ्या परप्रांतीय संशयित आरोपीला सीसीटीव्ही फुटेजच्या आधारे कोदगाव चौफुलीवर मुद्देमालासह चाळीसगाव शहर पोलिसांनी अवघ्या तीन तासांत जेरबंद केले. चोरीची ही घटना गुरुवारी रात्री ९.३० वाजता घडली होती. याप्रकरणी चाळीसगाव शहर पोलिस ठाण्यात गुन्हा दाखल करण्यात आला आहे. बालवीर माखन सिसोदिया (वय १९, रा. गुलखेडी, ता.पचोर, जि. राजगड, मध्यप्रदेश) असे अटक केलेल्या आरोपीचे नाव आहे.
मिळालेल्या माहितीनुसार, शहरातील हॉटेल कमलशांती पॅलेस या ठिकाणी गुन्ह्यातील फिर्यादी सरोज मुकुंद देशपांडे यांच्या मुलीचा लग्न सोहळा आयोजित करण्यात आला होता. यात सरोज यांच्याकडे नवरीचे सोन्याचे दागिने, रोख रुपये व मोबाईल असा मुद्देमाल अज्ञात चोरट्याने लांबवला. चोरी केल्याची घटना घडल्यानंतर पोलिसांनी परिसरातील आणि धुळे-कन्नड बायपास रोडवरील हॉटेलमधील सीसीटीव्ही फुटेज तपासले. त्याच्या आधारे आरोपी बालवीर माखन सिसोदिया याला कोदगाव चौफुलीवर तीन तासांत अटक केली.
यांनी केली कारवाई
पोउनि योगेश माळी, पोना दीपक पाटील, पोकों नंदू महाजन, पोकॉ अजय पाटील, पोहेकों राहुल सोनवणे, पोकों विनोद खैरनार, पोकों रवींद्र बच्छे, पोकों आशुतोष सोनवणे, पोहेकों नितीन वाल्हे यांनी ही कारवाई केली आहे. अवघ्या तीन तासांत संशयित आरोपीला अटक केल्याने लग्नातील वधू व वराकडील नातेवाइकांनी कौतुक करुन पोलिसांना गौरविले. पुढील तपास पोना दीपक पाटील हे करीत आहेत.
