भडगाव : प्रतिनिधी
तालुक्यातील कोळगाव येथील भूषण दिलीप महाजन (३२) या दौंड (पुणे) येथे एसआरपीएफमध्ये असलेल्या व गावी सुटीवर आलेल्या जवानाचा शनिवारी रात्री दुचाकी अपघातात मृत्यू झाला. ग्रामस्थांनी या सुपुत्रास मिरवणूक काढत शेवटचा निरोप दिला.
मिळालेल्या माहितीनुसार, भूषण महाजन (पाटील) हे लहान भावाला मुलगी झाल्याने बारशाच्या कार्यक्रमासाठी गावी काही दिवसांच्या सुटीवर आले होते. ते काही कामानिमित्त बाहेर गेले होते. रात्री ८ ते ९ च्या सुमारास गावानजीक दुचाकीने येत असताना अपघात झाला. त्यांना प्रथम चाळीसगाव येथे खाजगी रुग्णालयात तेथून ग्रामीण रुग्णालयात उपचारासाठी नेत असतानाच त्यांचा मृत्यू झाल्याची माहिती मिळाली.
शवविच्छेदनानंतर त्यांचे पार्थिव गावी आणत कोळगाव-पारोळा मार्गावरील एका शेतात त्यांच्यावर अंतिम संस्कार करण्यात आले. भूषण महाजन व त्यांचे दोन बंधू सैन्यदल, कारागृह पोलिस सेवेत आहेत. महाजन यांना लहान मुलगा व मुलगी आहे. आई वडील व पत्नी असा परिवार आहे. जवानाच्या मृत्यूनंतर बाजारपेठ बंद ठेवण्यात आली होती. तरुणांनी गावातून सजवलेल्या ट्रॅक्टरवरुन मिरवणूक काढली. गावात, चौकात रांगोळी काढण्यात आल्या होत्या.
